احنا اللى ظلمنا الحب

ظلمنا الحب
الحب لازم يكون موجود
بلونه بكل معانيه
الحب مازال موجود
بس فين أراضيه
الحب تايه مش لاقى
سما ولا أرض تحميه
الحب محتاج أرض عفية
ومياه تروية
وناس تعرف قيمته
والكل يسكن فيه
الحب فين زرعناه
فى أرض خصبه تراعاه
ولا فى الصحرا دفناه
الحب أصبح كالبراكين
والفراق اصبح شىء مهين
وكل يوم بنسمع عن اتنين
فى الحب فاشلين
وكمان اتنين مطلقين
واتنين تانى متفرقين
واتنين لا متجوزين ولا مطلقين
وكل واحد بيحكى
نصدق مين ولا مين
والحب بينهم اتظلم
ومكانه فى الجسد انجرح
وكأنهم كانوا مغيبين
الحب عندهم له قوانين
مفيش تسامح مفيش تنازل
ومين يقدر على مين
هو الحب نزاع بين اثنين
ولا الحب تراحم بين قلبين
هو الحب شجار وخصام
ولا الحب حنان ووئام
هو الحب كذب وعصيان
ولا الحب شجن وأمان
هو الحب مشاكل ومحاكم
ولا الحب سكن وتراحم
هو الحب شتيمه وتطاول
ولا الحب تلاحم وتواصل
الحب زرعناه
وبسرعه نزعناه
وتوب حزين لبسناه
وفى النعش شعيناه
واصبح باكى مما صنعناه
وفى الأول والأخر ظلمناه
بدون قلب وعقل وروح موتناه
واحنا اللى ظلمنا الحب
فتحى صفا